من الأخر خلينا نقوم بمهمة الراديو بتاع زمان مع أطفالنا. مع الوقت و التعود أنتي كأم هتستمعي بالوقت ده مع طفلك و هتخففي شوية من تأنيب الضمير اليومي أنك مقضتيش وقت كفاية مع طفلك اليوم ده
لأني أم لتؤام و كنت في الغربة بعيد عن أي مساعدة من أهلي كان لازم ساعات كتير افكر في حلول تهون عليا المهام الكتير اللي أي أم لتؤام بتمر بيها خاصة في الشهور الأولى. على سبيل المثال أحياناً كنت بنجح في تنويم واحدة من بناتي في القيلولة في حين البنت التانية كانت بترفض تماماً النوم. مع الوقت اكتشفت أن بنتي ممكن تنام بس على صوتي لما أكلمها. فبدأت اسجل كتب الأطفال بصوتي و أخليها تسمعهم و أنا في وسط المهام التانية اللي لازم أنجزها. شوية شوية و مع كتب كتير قرأتها لاقيت أن فيه دراسات كتير بتحث على أهمية القرأة للأطفال ابتدائاً من وقت ولادتهم و حتى اثناء وجودهم في رحم الأم.
مثلاً في كتابها
The Enchanted Hour: The Miraculous Power of Reading Aloud in the Age of Distraction
أتكلمت الكاتبة ميجان جردون عن فوائد القرأة للأطفال من سن صغير. و منها
تعزيزها للنمو النفسي و الاجتماعي للطفل
تقوية العلاقات العاطفية بين الطفل و أمه
تنمية قدرات الطفل على التركيز و التخيل
على المدى البعيد تساعد في تفوقه الأكاديمي
و طبعاً تزيد من محصلته اللغوية خاصة لو فيه قرأة بأكتر من لغة ده بيساعد الطفل على التمييز بين قواعد و تركيب اللغتين
بتقلل من مشاعر الغضب و التوتر عند الأطفال
بتساعد الطفل انه يروي أحداث يومه و يعبر عن مشاعره
بتقوي ذاكرته و قدرته الأبداعية
طيب نقرا أزاي لأولادنا؟
كتير من الأمهات بيكون وقتها مشغول جداً خلال اليوم لكن اللي منعرفهوش ان خمس دقايق بس مرتين في اليوم كفاية انهم يخلوا الطفل يسمع أكتر من ٤٨٣ ألف كلمة في اليوم الواحد
من أول عمر السنتين خلي طفلك مستمع متفاعل مع القصة، يعني مثلاً نخليه يقلب الصفحات، نسألة انت شايف أيه في الصورة، أيه عدد حاجة معينة في الصورة أو لونها... إلخ.
نشاور عالكلمات و احنا بنقراها عشان مع الوقت يرتبط في ذهن الطفل شكل الكلمة مع نطقها
نسمح للطفل أنه يقعد في حضن أمه أو على رجلها و طبعاً مننساش أننا نسمح للطفل الحركي انه يسمع القصة و هو بيلعب او بيتحرك لو كان ده اللي هو يفضله لأن قدرة عالتركيز بتزيد عند حركته الدائمة دي
نغير شوية في نبرة صوتنا و نعمل بصوتنا مؤثرات صوتية زي صوت خبط عالباب او صوت حيوان معين و هكذا عشان نشد انتباه الطفل أكتر
لو فيه وقت نتكلم شوية مع الطفل عن القصة بعد الانتهاء من قرائتها، مثلاً رأيك في الشخصية دي؟ أو ممكن تعمل أيه لو كنت مكانه؟
