طفلك مش بيشارك؟ طفلك مش حاسس بالآمان او طفلك مفيش قدامه القدوة الصح
زي ما اتفقنا في المقال الآخير ان الطفل تحت عمر الست سنوات مخه بيمتص اي حاجة بيشوفها قدامه و يقلدها زي صورتك في المراية. دايما خلي بالك ان اسلوب تعاملك مع حاجتك اللي ملكك هو نفس اسلوب تعامل طفلك مع حاجته. لو تليفونك المحمول و اللاب توب بتاعك هم اغلى حاجة في حياتك، عروسة بنتك البلاستيك و تليفون ابنك اللعبة هم اغلى و اهم حاجة في حياته. لو بتزعقي لطفلك اوي ما يجي جنب حاجتك و لو بتصرخي اول ما يفتح اللاب توب بتاعي و لو بتنهاري اول ما يتصل بحد بالغلط على تليفونك طبيعي جدا ان طفلك يضرب صاحبه اللي اخد منه اللعبة بتاعته و بنتك تزق صاحبتها اللي طلبت منها تشوف عروستها. عمر المشاركة (التصرفات الصح عموما) ما تيجي بالتعليمات و الآوامر مع الطفل تحت الست سنوات. قولي و عيدي زي ما انتي عايزة: "شارك، ادي صحابك، خليهم يلعبوا معاك، مش بتاعتك لوحدك" و كل ما هتقولي كل ما طفلك هيعند و كل ما اللي حواليه هيزعلوا منه اكتر ده غير ان ذاكرته مش متبرجمة انها تفتكر تعليماتك و صوتك العالي لكن متبرمجة انها تبقى كاميرا تصور تصرفاتك و تصرفات الكبار اللي حواليه و تعيد عرضه بس من خلال تصرفاته هو. عايزاه يشارك؟ يبقى لما يمسك تليفونك وريله يشغله ازاي و يروح لبرنامج او لعبة خاصة بيه او من الاول شيلي تليفونك بعيد عن نظره او آلفتي انتباهه لحاجة تانية بالراحة و تكون حاجة فعلا هيحبها. عايزاه يشارك؟ لما يمسك مفتاح باباه خليه يوريله ازاي يستعمله و مع الوقت شيلوه عنه و اعمليله سلسلة مفاتيح بتفتح اقفال خاصة بيه او مبتفتحش حاجة من اصله. عايزاه يشارك اديله حرية و مساحة يجرب و يتعلم و عرفيه الخطر و الغلط من خلال التجربة او كتب او فيديوهات مش من خلال الزعيق و الضرب عشان متزوديش فضوله و تخليه يكدب و يخبي و تخليه اناني و حاد في تعاملاته
النقطة التانية و الآهم ان طفلك عمره ما هيشارك لو مش حاسس بالآمان. لو مش حاسس ان لعبته بتاعته لوحده و هو بس اللي في ايديه القرار يشاركها او لا. لو مش حاسس انه مسئول يحافظ عن لعبته و يحميها. و في الاٌغلب طفلك معندوش القدرة ان يشارك تحت سن التلات سنوات عشان في الفترة دي مخ الطفل بيحاول يفعم العالم من حواليه اللي هو في وجهة نظره بتاعه هو بس. لما تجيبي حاجة جديدة فهمي طفلك ان في حاجة بتاعته هو و لوحده زي عربية السبق الجديدة و في حاجات بتاعة الكل و اي حد يستخذمها زي كتاب او لعبة جماعية. لعبته اللي جاية ليه لوحده متخبيهاش منه ساعة العقابك ، لما يجي يخرج و يطلب منك يسيبها عالكنبة لحد ما يرجع لازم يرجع يلاقيها عالكنبة، ما تزعقلوش لما ميرضاش يلاعب بيها ابن طنط نادية اللي جت تزوركم فجآة. و لو ابن طنط نادية اتشال و اتحط و عمل شقلبظات في الهوا عشان عايز لعبة ابنك، روحي لابنك و قوليله: "انا عارفة انت بتحب العربية دي قد ايه و كويس انك بتحاول تحافظ عليها. انا عارفة انه ساعات صعب نشارك الحلجات اللي بنحبها بس المشاركة بتخلي الكل مبسوط و يلعب مع بعضه. لو شايف انك مش قادر تشارك دلوقتي لو سمحت شيل اللعبة في اودتك و آلعب بيها بعدين بس ساعتها هتضطر تلعب بيها لوحدك عشان صاحبك هيكون مشي". لو اختار يشيلها فعلا سيبيه يشيلها و يحس بالآمان في بيته زي ما انتي مش هتدي طنط نادية موبايلك تقلب فيه ولا شنطة ايدك تدعبس فيها. بعدين بصي لطنط نادية و قوليلها: "معلش متزعليش بس احنا اليومين دول بنحاول نعلمه ازاي يختار و نتيجة اختياره"، متتكسفيش و اتفكري ان طنط نادية كدك كدة هتزعل لو مش من ابنك و اللعبة يبقى من العصير اللي متقدمش او منك عشان بقالك ست شهور مسآلتيش عليها او عشان خبيتي عليها خبر انك حامل. من الاخر كل الناس هتزعل و هتراضيهم بس بلاش تراضيهم على حساب اولادك
افتكري دايما ابنك هيشارك لما تقدمي قدامه مثال صح. لما تاخدي من اكلك السخن الطازة و تعملي طبق و تقوليله تعالى نديه للراجل الغلبان اللي في اول الشارع شكله معندوش اكل النهاردة. لما تقوليله قبل ما نروح نلعب مع بنات ابلة حكمت تعالى نشتري كيس بسكوت عشان ناكله كلنا سوا و نفرح باللمة، لما يلاقيكي فرحانة و سعيدة لما تعرفي ان فيه ضيف هيزوركم مش متنكدة و عمالة تفكري هقدم ايه و هعمل ايه. لما يفهم ان زيارة الآهل و الصحابة حاجة حلوة و تبسط (حتى لو مكانتش كدة بالنسبالك لازم تبيني انها كدة). طفلك هيشارك لما يفهم ان واجب الضيافة يعني كرم و ابتسامة و باب مفتوح بس مش تعدي على خصوصياته و آوامر و توجيهات انه بالعافية يشارك حاجته اللي بيحبها.
اما بقى لو طنط نادية طلعت ذوق و بنت حلال و اتصلت قبل ما تزورك عشان تقولك انا جايالك كمان ربع ساعة و هجيب معايا العفريت بتاعي يبقى بسرعة قبل ما تنضفي لبيت و تطلعي الصيني قعدي مع ابنك. قوليله طنط نادية جية و معاها عليوة انا عارفة انك بتحب تلعب معاه ممكن بسرعة تطلع اربع لعب تحب عليوة يلعب معاك بيهم؟ لو مش عايزة عليوة يلعب بالعربية الجديدة لو سمحت تشليها في دولابك و ممنوع تماما تطلع في وجود عليوة. اللعب اللي هتختارها معناها انك هترضى ان عليوة ياخد دور يشوفهم و يلعب بيهم و هتتبسطوا انتوا الاتنين بالوقت الحلو اللي قضته مع بعض
