بالنسبة للآلعاب و الانشطة المناسبة للاطفال من سن ٣-٦ شهور دي هتكون اخر حلقة النهاردة ان شاء الله. تابعونا عشان هنبدآ سلسلة الالعاب لسن ٦ شهور الاسبوع اللي جي بآذن الله. طبعا كل الافكار دي على سبيل المثال و ليس الحصر يعني ممكن تبتكري انتي افكار من عندك او تدوري عالنت و الافكار ملهاش اول من اخر. بما اننا كنا بنتكلم على اهمية الرياضة للاطفال خلونا نبدآ بتمرين رياضي مهم جدا للاطفال في السن ده:
٨. النوم على البطن: مهم جدا انك تعودي طفلك انه ينام على بطنه من نص ساعة لساعة اول ما يتم التلات شهور لآن ده بيكون زي تمرين الضغط بتاع الكبار... بيقوي العضلات و يساعد الطفل انه يحاول يتقلب و يقوي عضلات رقبته. اهم حاجة طبعا انك لازم تكوني جنب طفلك و هو في الوضع ده و انك متسيبهوش ابدا ينعس و هو على بطنه عشان خطر الاختناق الله لا يقدر. احيانا ممكن تكون عضلات الطفل ضعيفة او لسة مبيقدرش يتقلب فممكن يختنق لو نام على وشه و معرفش يتنفس. عشان تشجعي طفلك انه يرفع راسه و يتقلب ممكن تحطي جنبه اي لعبة هو بيحبها و يا سلام لو بتنور او بتعمل صوت يلفت انتباهه. كمان يا ريت تنامي جنب طفلك و تخلي راسك في مستوى راسه الاطفال في السن ده بتحب تدرس تعبيرات الوشوش جدا.
٩. موضوع تعبيرات الوشوش ده ياخدنا لنشاط تاني شائع في نظام المونسوري انك تحطي مراية جنب طفلك لآنه بيحب جدا انه يتابع حركات جسمه و يشوف وشه فيها. بالنسبالي موضوع المراية دي اللي شجع بنتي انها ترفع راسها و تبص.
١٠. شجعي المهارت الحسية و حاسة اللمس و التعرف عالآشياء من خلال اللمس بآنك تحضريله علبة او صينية فيه حاجات امنة من اللي موجودة في البيت بس ياريت تكون الحاجات دي مختلفة في الملمس و الصوت و الشكل بحيث انك تنشطي كل حواس الطفل. امثلة للي ممكن تحطيه في العلبة: مكعبات، كور، فرشاة شعر صغيرة، كوباية بلاستيك، مشبك، حيوانات بلاستيك، قطعة ليفة صغيرة، شرايط قماش صغيرة، جرس... الخ.
الفكرة دي علمتهالي مامتي اول ما ابتديت اعلم البنات الاكل. كتير من الناس بيلهوا الاطفال بالتليفزيون عشان يعودوهم عالآكل لكن غير الاضرار الصحية للتليفزيون خاصة للاطفال تحت سن التلات سنين الا ان كمان البيبي بيسرح في التليفزيون و بينسى يمضغ. جربي تطفي التليفزيون و تديله في ايده اي حاجة من حاجتك بيمسكها لآول مرة و استمتعي بكم الانبهار اللي هتشوفيه في عيون البيبي. اديله علبة مكياج و سيبيه يلعب بيها لحد ما يكتشف ازاي يفتحها او طبق بلاستيك عميق و مضرب سيلكون و علميه يقلب او ازازة فاضية حطي فيها شوية رز و خليه يرجها او عصارة ليمون و سيبيه يفتح و يقفل فيها... او اي فكرة تانية تيجي في بالك. متنسيش ان الحاجات اللي انتي متعودة عليها في حياتك اليومية جديدة لانج في ذاكرة طفلك. و دايما افتكري ضرورة اللغة و انك تكلمي و توصفي كل حاجة بتعملوها.
١١. صلصال آمن للآكل: قوي قلبك و افرشي مفرش بلاستيك عالآرض و استعدي للغوصة. قلبي كوباية دقيق رز ناعم مع ٣ معالق كبيرة زيت جوز هند سايح و خلي الخليط يبرد. طبعا الصلصال ده للطفل بعد سن الاربع شهور يعني بيعرف يقعد و يمسك ضهره عشان يقدر يلعب بالصلصال. (يفضل تستشيري طبيبك لو خايفة يكون فيه حساسية من جوز الهند)
١٢. اكياس الالوان: قلبي كام معلقة زبادي بنقطة آلوان طعام و حطيهم في كيس و اقفلي عليهم كويس بحيث يكون فيه مساحة للزبادي انه يتحرك. ادي الكيس للطفلك و سيبيه يلعب بالكيس على ترابيزة الاكل هيشده اوي منظر الزبادي و هو بيتحرك في الكيس. زيادة امان ممكن تلزقي الكيس بلزق زي بتاع الدهان من كل الجوانب عالترابيزة بحيث ان البيبي ميقدرش يشيله من مكانه و يحطه في بقه. لو وصلتي لمرحلة انه امان للطفل انه ياكل زبادي ممكن تحطي معلقتين تلاتة من الزبادي الي مضافلة نقطة الوان طعام على ترابيزة الكل بتاعة البيبي او اي سطح نضيف و سيبيه يلون و يشخبط و ياكل براحته.
يا رب تكون الانشطة عجبتكم و ياريت تقولولي لو عملتوا حاجة منها مع اطفالكم و كان رد فعلهم ايه؟
